Doelpale geskuif en jonges wen (steeds)

THABAZIMBI – As jy ooit gedink het dat net ‘n politieke party doelpale kan skuif om ‘n gunstige uitslag te verkry moes jy Saterdag gehoor het hoe daar gekonkel is by die Thabazimbi Gholfklub om die Jonges te laat wen, met net een punt. Al moes hulle selfs van die Oues se punte steel om dit reg te kry.
Maar alle grappies op ‘n stokkie, geluk aan die jonges wat met een punt gewen het. Dit is egter net kommerwekkend dat die ouderdom snypunt op 52 moes wees. Waar is al ons mooi, gesonde, sterk en jong gholfspelers?  Henry Bredenkamp was die individuele wenner met 43 punte. Ander goeie punte was die van Billy Pring (37), Chris Bronkhorst (36) en op 35 was daar vier spelers, Vollie Volschenk, Nita Barnard, Johan Barnard en Jeanetta Rall.
Eerskomende Saterdag se spel is ‘n vol Amerikaanse Krabbel (American Scramble). Spelers moet in pare inskryf wat dan in vierballe getrek sal word.
Stadige spel is, afgesien van die voorgee-stelsel, die ander onding wat seker van die bestaan van gholf af ‘n probleem is. Voordat die sogenaamde stadige spel egter veroordeel word moet dit in die regte perspektief gesien word. As ‘n baan se lengte, en die baansyfer teen tyd bereken word is daar net so om en by drie minute tyd om elke hou te speel, as elke hou op die skoonveld is en daar nie na balle gesoek moet word nie. Dit sluit die loopafstande tussen setperk en bof ook in maar nie die halftyd in die klubhuis nie. Dan is vier uur plus vir ‘n rondte vir ‘n vierbal oor 18 putjies baie realisties.
Die goue reël bly egter altyd om die vierbal voor jou altyd in die oog te hou.